xintidu finu

gosi k'm txiga kasa
odju kapridu
stangu fuliadu
spritu lapidu

pensamentu sata ladridja
tudu bes ki é tranka ku bu korpu
na madri xintidu

na kantu borronsera
bridja dja màra baron - ta toka
perna sta torsidu
unha dja bua

na madri xintidu
kudadu dja màra kabesa
sombra dja fitxa odju
korpu dja bisti nupriti

silensio sata sakuta surtu

Di

Sopra la undi bu meresi

Kumi la undi é di bo

Kumera é na tetu

Poi mò dentu pettu...xinti 

si é mesmu kor d’onti

Lembi sentura

Txupa indjarga

Konta vibrason

Nariz dja fitxa

Pò mò,txupa dedu

Kuspi’n na boka

Djan kré papia nha gostu na bu paladar...

boka fitxa

na labada kosta temperatura madur
petu korta
odju respira
sentimentu konta pa razon
n'ka dexa ama pa ka odia
n'ka dexa kumi pa ka xinti fomi
n'dexa marra ku speransa na ka dexa kapri